نئی دہلی،12؍مارچ(ایس او نیوز؍ایجنسی)5 ریاستوں کے اسمبلی انتخابات کے نتائج آ چکے ہیں - بھارتیہ جنتا پارٹی نے سب سے بڑی ریاست اتر پردیش سمیت اتراکھنڈ، منی پور اور گوا میں کامیابی حاصل کی ہے-

دوسری جانب عام آدمی پارٹی (عآپ) نے پنجاب میں یکطرفہ کامیابی حاصل کی ہے- پانچ ریاستوں کے نتائج کا اثر راجیہ سبھاکی سیٹوں پر صاف نظر آئے گا- چار ریاستوں میں جیت کے باوجود بی جے پی پارلیمنٹ کے ایوان زیریں میں نمبروں سے دور رہے گی- دوسری جانب پنجاب میں جیت کا فائدہ عام آدمی پارٹی کو ملے گا- سماج وادی پارٹی بھلے ہی اتر پردیش میں ہار گئی ہو، لیکن راجیہ سبھا میں پچھلی بار سے زیادہ سیٹیں جیتنے کا فائدہ اسے ملنے والا ہے-2022 میں راجیہ سبھا کے 75 ممبر اپنی مدت پوری کر رہے ہیں - اس میں 7 نامزد ارکان بھی شامل ہیں، جب کہ کرناٹک اور بہار میں ایک ایک سیٹ خالی ہے- اس مہینے کی31تاریخ کو 6 ریاستوں میں راجیہ سبھا کی 13 سیٹوں کیلئے انتخابات ہونے جا رہے ہیں، جن میں سے 5 سیٹیں صرف پنجاب کی ہیں -

اس کے علاوہ کیرلا میں تین، آسام میں دو، ہماچل پردیش، تریپورہ اور ناگالینڈ میں ایک ایک سیٹ شامل ہے-اس وقت راجیہ سبھا میں بی جے پی کے پاس کل 97سیٹیں ہیں - اتحادی جماعتوں کے ساتھ یہ تعداد 114 ہے، لیکن اپنے طور پر بی جے پی اب بھی اکثریت کے اعداد و شمار سے دور ہے- اتر پردیش میں پارٹی کی سیٹیں پچھلی بار کے مقابلے کم ہوئی ہیں جس کا اثر راجیہ سبھا کی سیٹوں پر پڑے گا- ساتھ ہی اتراکھنڈ میں بی جے پی کی سیٹیں بھی کم ہوئی ہیں -